89. Хооран цухрҗ уга / Не отступили, не сломались (Исп. Л. Эрдниева)
Үгнь Бакура Баир
Айснь Джиджикин Сергей
Догшн һашута тер цаглань,
Дигтә немшнрлә ноолдҗах кемләнь,
Хөн үвләр улан залатань
Ховас көлтә цааҗла харһлал.
Өрүн өрлә буута салдсмуд
Бууһин ам далднь шахҗ,
«Бүүрән сольҗанат» ― гиҗ мөсләд,
Баахн-көгшнинь авад һарч.
Хар цагин һашуһинь зальгвчн,
Хальмгуд хооран цухрҗ уга.
Хату тер зүрктәһин закврнь
Тохм-заңгинь таслҗ уга.
Кесгнь зууран үрнәсн хаһцла,
Кесгнь зууран даарч үклә.
Хортнла дәәлдснь баһ болсмби?
Күүнә цусна далань хагссмби?
Нутгиннь төлә цусан асхсн,
Таңһчан туурулҗ, дәәснлә бәрлдсн.
Төрскнч седкләрн тован сумлсн,
Нам эдниг тиигҗ цааҗлдви?
Хар цагин һашуһинь зальгвчн,
Хальмгуд хооран цухрҗ уга.
Хату тер зүрктәһин закврнь
Тохм-заңгинь таслҗ уга.
Киитн өөд муулян эдлҗ,
Хәр һазрт нульмсан асхҗ,
Хар цагин һашуһинь зальгҗ,
Күүнә герт һулмтта болдви?
Көрстә хол Сиврин цасиг
Ундна ормд эдлҗ йовдви?
Көрә тер боднцгин хальсиг
Хот кеһәд өлнәсн һардви?
Хар цагин һашуһинь зальгвчн,
Хальмгуд хооран цухрҗ уга.
Хату тер зүрктәһин закврнь
Тохм-заңгинь таслҗ уга.