73. Салдсин бичг / Письмо солдата (Исп. Т. В. Дорджиева)
Үгнь, айснь олн әмтнә болн
Амбекә Бовуш
Гертәсн һарад йовхлам,
Герлтә шам шатла.
Герлтә шамин герләр
Германя захар орлав.
Гертәсн һарад йовҗаһад,
Һаричн атхад мендлләв.
Һазрин меҗә деерәс
Һашута мендән тәвҗәнәв.
Асхн арвн часлань,
Атакур орх цаглань:
«Асхрҗах, шатҗах сумнас
Әәҗ, хооран һарш угав».
Салдс бор өрмгнь
Шаһаһинь цокҗ саглрна.
Сәәхн седклтә ээҗ-аав
Сөөһин зүүдндм серүлнә.
Ут бор өрмгнь —
Ут хаалһин ацан.
Уургарн өсксн ээҗ-аавм
Уйн төрҗ сангдна.
Альхн чигән әәрмин махлаһинь
Альк цохдан цокхдв?
Ач иктә аав-ээҗ
Ачитн хәрүлсн угалм.
Хәәһәд бичсн бичгм мини
Хәрү ирдгән уурвл.
Халун менд күргдгнь
Хар шовун болвлм.
Көк конверттә бичгән
Күүкн-иньгтән илгәләв.
Келәд болсн күүкн-иньгм,
Күләж, бичә цөкрич.
Ээҗдән бичсн бичгм
Ѳрмгинәм хавтхднь ильҗрвә.
Иньгинән өгсн альчур гидгнь
Элкндән оркн сегәрв.
Ѳшәтнә хасн бууһин сумн
Ѳрч цогцм шавтав.
Ѳврләд өсксн ээҗ-аавнь
Ѳрүн зүүдәрн медхл.
Күрң улан цусн мини
Күүнә һазрт асхрвл.
Көөркс мини ээҗ-аавм,
Кенән ода күләхв?
Немшин дәәнә көлд
Нәәмн чимгн әгрвл.
Намаһан гидг аав-ээҗ
Насни туршарт сангдхв.
Экрһән авшго дәәнә көлд
Эргин шовуд бултна.
«Эй, көөркс, эргин шовуд,
Ээҗдән мендинь күргит».