72. Иньгин тачал / Тоска по любимому (Исп. Т. В. Дорджиева)
Үгнь болн айснь
Амбекә Бовуш
Дөчн негдгч җилднь, җилднь
Делкә әмтн дәәвлнә.
Дурта иньг мини
Дәәнә көлд мордва.
Баһ наста көвүднь, көвүднь
Военный комендатура дуудулна.
Барлата цааснь атхулад, атхулад,
Болзг угаһар йовулна.
Хар уга аав-ээҗнь,
Хаалһичн йөрәж, йовулва.
«Халун менд ирхич» — гиҗ,
Хойр халхасчн өмсләв.
Әәрмд һарад йовхлачнь, йовхлачнь,
Ардасчнь дахҗ һарһлав.
Асхрсн нульмсн альчурарн арчсн,
Әрвн зүркндм үлдвч.
Харьков город деерәснь
Хойр бичг ирлә.
«Хортан дарҗ ирхв» — гиҗ,
Хойр давтҗ бичләч.
Көк бекәр бичсн бичгинь
Күүһәр бичүлҗ тәвләч.
«Күнд шавта бәәнәв» — гиҗ,
Киев таласнь ирв-лә.
Усхулад цокулсн зургчн, зургчн
Ѳрч деерән зүүләв.
Уйн төрҗ, хәләҗ хәләҗ,
Урдк дуричн сергәләв.
Орден, медаль зүүсн
Олн көвүд ирвә.
Ѳдрин сөөһин кемҗәнд
Орад ирхичн күләнәв.
Намч эрәтә альчуринь, альчуринь
Нандан гиҗ авлач.
Намаһан гисн хәәмнь, чамдан
Наснаннь туршарт тачалта-л.
Алтн болсн әмн-цогцан
Альд хайсн болхвч?
Альд кевтсн һазртчн күрч
Әмнәннь тачалан салһнав.