52. Сиврин салькнд / На сибирском ветру (Исп. анс. «Эрдм»)
Агчм цаһан альчурар, альчурар
Асхрсн нульмсан арчлав, арчлав.
Альхн дүңгә алтн нутгнь…
Альд бийәрн йовҗ җирһхв?
Асхн арвн часин алднднь
Автомашид хәргүләд бәәнә.
Аав-ээҗин зөөсн зөөрнь,
Арһсн болад, арднь үлдв.
Һалун гидг шовунь, шовунь —
Һашута дуута шовун гинә.
Һашута дуута шовуһинь соңсхинь,
Һазр-усн сангдад бәәнә.
Киитн, киитн Сиврин салькнд
Көлдәд, көкрәд йовдг көөрк хальмг.
Зовлң үзх маниг,
Заяч, юңгад заясн болхв?
Хур орсн цагтнь, цагтнь,
Хар һазрнь көкрх, көкрх.
Хөвнь ирсн цагтнь, цагтнь,
Хальмг чигн җирһх, җирһх!