37. Сиврин дун / Сибирская песня (Исп. Д. С. Очкаева)
Декабрь сарин хөрн нәәмнд
Дегц хальмгудыг нүүлhәд бәәнә.
Дегц хальмгудыг нүүлhәд бәәхнь,
Дегәд киитн Сибиртнь күргәд, буулhад бәәнә.
Уралын hолын уснас
Уухв гиҗ, кен санҗ йовла?
Учрсн хойр иньгин
Салхин селгән ирҗл.
Бүтү-бүтү машид
Бүрүлин алднднь ирәд, зогсад бәәвә.
Бүрүлин алднднь ирәд, зогсад бәәхнь,
«Белн болтн» — гиҗ команд өгәд бәәвлә.
Ардан будкта машиднь
Асхн бүрүлин алднднь авч hарад бәәнә.
Асхн бүрүлин алднднь авч hарад бәәхнь,
Абганерово станцд күргәд, буулhад бәәнә.
Абганерово станцас
Ар киитн үзгүр темцүләд бәәнә.
Ар киитн үзгүр темцүләд бәәхнь,
Арвн зурhан суткдан көрәд-көлдәд күрүвидн.
Арвн зурhадгч суткднь
Алтайин край деернь авч ирәд бәәнә.
Алтайин край деерәснь
Арвн колхозарнь авч тараhад бәәнә.
Мел санад йовхнь,
Мөңк мана чееҗәсн мел түрүц hархш.
Маниг hарhсн аав-ээҗ
Мартшго зовлңган үзәд йовдг билә.
Хәләhәд асрсн үкр-хөн, малмуднь
Хашаhан эргәд, мәәләд-шуугад үлдвә.
Хәләhәд өсксн эздүдтнь
Хайҗ hархд харм болад бәәнә.
Өр цәәhәд ирлә.
Аhш балhсыг давад hарувидн.
Өөкәр билгсн Аhшиг
Хайҗ hархд харм болад бәәнә.
Киитн-киитн Сибирин hазртнь
Көлдәд-көрәд йовсн
Көөрк мана хальмгудт
Кезә нег цагт җирhл ирх болхнь.
Нүүрс ачдг улан вагон
Нүүлhәд, хальмгудыг авч hарад бәәнә.
Нүүлhәд, хальмгудыг авч hарад бәәхнь,
Нүүлтә буйнта хойриг йилhх яhна!
Өссн-боссн hазр-уснас
Үвлин түрүн сарднь көндәhәд бәәнә.
Үвлин түрүн сарднь көндәhәд бәәхнь,
Үвлин түрүн зовлңган үзсн көөркс.
Арвн тавна сар —
Ааh мет төгрг, сәәхн билә.
Аав-ээҗин зөөсн зөөр
Арhсн мет болҗ, арднь үлдәд бәәнә.
Хәргәд ирсн немшин церг
Ханатын тагт деер ирҗ, зогсад бәәнә.
Ханатын тагт деер ирҗ, зогсад бәәхнь,
Хара бәәх хальмгудт хортна нер өгвл.
Җирилhәд бәрсн шавр гермүд,
Җирлhн болад, арднь үлдәд бәәвә.
Җирhлтәhәр бәәсн хальмгудыг
Җирhлтә hазраснь көөhәд, hарhад бәәнә.
Альхн чиңгә цаhан альчурарн
Асхрсн нульмсан арчад йовлавидн.
Әвртә икл Сибирин hазртнь
Альдаhурнь орҗ җирhх болхм?
Һалун гидг шовун —
Һашута дуута шовун билә.
Һашута сәәхн дууhинь соңсхлань,
Һазр-усн сангдад бәәнә.
Арат гидг аң —
Альвн-дольвн аң билә.
Аав-ээҗин зөөсн зөөрнь,
Арhсн мет болҗ, арднь үлдәд бәәнә.
Серго нертә паровоз
Саратовин дундаhурнь ирҗ, зогсад бәәнә.
Санамр бәәсн мана хальмгудыг,
Сана-серл өгл уга, авч hарад бәәнә.
Көк ширтә товарн вагонд
Көгшн-бичкн хойринь авад hарад бәәнә.
Көгшн бичкн хойринь авч hарад бәәхнь,
Киитн Сибирь гидгтнь буулhад хаяд бәәнә.
Харада гидг шовун —
Хальҗ сәәхн нисдг шовун.
Хойр хальмг харhвас,
Хәрхән күүнднә, нүүхән күүнднә.
Усн болсн хар әркинь
Уудг мана ахнр кезә ирх болхв?
Учрсн хойр иньгин
Җирhәд суудг цагнь кезә ирх болхмб?
Зурмн гидг аңнь
Зунын hурвн сарднь чичкнәд бәәнә.
Зовлң үзх көгшн, бичкн, мадниг,
Заяч, юңгад заясн болхмб?