29. Сиврин дун / Сибирская песня (Исп. Б. Б. Манджуракова)
Үгнь болн айснь
Манҗурака Булһн
Аршм цаһан альчурар, альчурарнь
Асхрсн нульмсан арчад гинә суулав. / 2 д.
Әвртә ик-лә Сиврин һазртнь
Альдкнь гинә болвчнь җирһхв, җирһхв. / 2 д.
Үүлн өңгтә машин деернь
Уульн дуулад, шуугн дуулад, ачад һарад бәәвә. / 2 д.
Уульн дуулад, шуугн дуулад, ачад һарад бәәхләрн,
Үвлин түрүн сарлань көндәһәд бәәв. / 2 д.
Бүркәтә цаһан машиднь, машиднь,
Бүрүлин алднднь ирәд, зогсад бәәв. / 2 д.
Бүрүлин алднднь ирәд, зогсад бәәхләрн,
Бичкн көгшн угаг ачад, һарад бәәв. / 2 д.
Хурҗңнад гүүдг машиндән: «Бәәтн» — гинә.
Түлкүләд, чичүләд, авад һарад бәәв. / 2 д.
Түлкүләд, чичүләд, авад һарад бәәхләрн,
Төрскн орн-һазрасн ууҗад һарувидн. / 2 д.
Асхндан арвн часин алднднь
Аһшинәннь өөгүрнь давад гинә һарувидн. / 2 д.
Аһшинәннь өөгүрнь давад гинә һархларн,
Асхрсн нульмсан арчад йоввидн. / 2 д.
Улан-ла ширтә поезднь, поезднь,
Уралан хәләһәд, делсәд һарад бәәв. / 2 д.
Улан-ла залата мана гинә хальмгуднь
Улм-улм һазрасн ууҗад йовв. / 2 д.
Арвн-ла тавдгч суткднь, суткднь
Алтай крайднь авч ирәд, хайв. / 2 д.
Алтай крайднь авч ирәд, хайхларнь,
Арвад-хөрәд өркәрнь тараһад бәәв. / 2 д.
Колхозас ирсн гинә кесг олн көлгднь,
Күрилдәд, зерглдәд зогсҗ гинә бәәҗ. / 2 д.
Күрилдәд, зерглдәд зогсад гинә бәәхләрн,
Кесг олн колхозарнь тараһад бәәв. / 2 д.
Ода-ла хальмг улс гинә-лә,
Орс гинә дунднь бәәнәвидн, бәәнәвидн. / 2 д.
Ончта сәәнәр көдләд, көдләд,
Орн гинә һазртнь күрх, күцх болыя! / 2 д.